بھارتی لوک سبھا انتخابات میں کس پارٹی کو برتری حاصل ہے؟

11
بھارت میں لوک سبھا انتخابات کے ایگزٹ پول کا سلسلہ جاری ہے، جس میں حکمراں اتحاد کو برتری حاصل ہے۔

بھارت میں لوک سبھا انتخابات کے ایگزٹ پول کے مطابق 543 میں سے 458 نشستوں کے غیرحتمی نتائج میں حکمراں اتحاد آگے ہے۔

بھارتی میڈیا کے مطابق مودی کی جماعت بی جے پی اتحاد کو 284 نشستوں پر برتری حاصل ہے جبکہ اپوزیشن کانگریس کے اتحاد انڈیا کو 151 نشستوں پر برتری حاصل ہے۔ بھارتی میڈیا کا کہنا ہے کہ دیگر جماعتوں کو 23 نشستیں حاصل ہونے کا امکان ہے۔

ایگزٹ پول نتائج پر ایک بیان میں بھارتی وزیر اعظم نریندر مودی نے کہا ہے کہ بھارت نے ووٹ دیا، شکریہ جنہوں نے حق رائے دہی استعمال کیا، ان تمام لوگوں کی فعال شرکت ہماری جمہوریت کی بنیاد ہے۔ بھارتی وزیر اعظم کا مزید کہنا تھا کہ انتخابات میں خواتین اور نوجوانوں کی شرکت بہت حوصلہ افزا ہے۔

بھارتی میڈیا کے مطابق بی جے پی کی قیادت میں اتحاد نیشنل ڈیموکریٹک الائنس کو 543 میں سے 350 سیٹیں ملنے کی توقع ہے۔

رپورٹ کے مطابق اپوزیشن اتحاد ’انڈیا‘ کو 120 سیٹوں پر کامیابی ملنے کی توقع ہے، سادہ اکثریت کیلئے 272 نشستیں درکار ہیں۔ حکمراں اتحاد کی کامیابی کی صورت میں نریندر مودی مسلسل تیسری بار بھارت کے وزیراعظم بنیں گے۔

خبر ایجنسی کی رپورٹ کے مطابق مودی جواہر لعل نہرو کے بعد مسلسل تیسری بار وزیر اعظم بننے والے بھارت کے دوسرے رہنما ہوں گے۔

تبصرے بند ہیں.