#کالم

الحمرا میں نوجوانوں کی آواز، فکرِ اقبال کی بازگشت اور ایک روشن مستقبل کی نوید

Untitled 1

منشاقاضی

علامہ اقبال نے نوجوانوں کو شاہین کی پرواز، خودی کی پہچان اور بلند مقاصد کا پیغام دیا۔ اب وقت ہے کہ ہم اس پیغام کو صرف کتابوں تک محدود نہ رکھیں ، بلکہ اسے اپنی سوچ کردار اور عمل کا حصہ بنائیں اسی عزم کے ساتھ یوتھ ایمپاورمنٹ سوسائٹی YES نے ایک بار پھر پیش کیا ہے جشن اقبال ایک ایسا پلیٹ فارم جو جوان نسل کو فکرِ اقبال سے روشناس کرانے ِ قومی ورثے سے جوڑنے اور ان کی علمی ادبی تخلیقی اور قائدانہ صلاحیتوں کو اجاگر کرنے کے لیئے وقف ہے۔ YES اور اور بزم اقبال حکومت پنجاب کی معاونت سے تین دنوں میں شرکائ کو مختلف نشستوں، ادبی و تخلیقی سرگرمیوں، مقابلہ جات اور دیگر دلچسپ پروگراموں کے ذریعے سیکھنے، سوال اٹھانے، اپنی صلاحیتیں منوانے اور نئے خیالات سے روشناس ہونے کے مواقع میسر کیئے ہیں۔ اس سلسلے میں نوجوان قائد عرفان بٹ کی کاوش اللہ کی نوازش ہے اور انہیں نوجوانوں کے اجتماعی ضمیروں میں احترام کا سزا وار قرار دیا گیا ہے۔ ملک کے ممتاز دانشور صحافی محترم مجیب الرحمٰن شامی ، وفاقی وزیر منصوبہ بندی ڈویلمنٹ احسن اقبال ، سی ٹی این فورم کے چیئرمین مسعود علی خان ، سعد نذیر سربراہ تکمیل پاکستان اور ابرار الحق نے عرفان بٹ کو اقبال کے افکار و نظریات کا پرچارک قرار دیا ہے۔ اقبال محض ایک شاعر کا نام نہیں، ایک عہد کا شعور، ایک قوم کی فکری بیداری اور ایک ایسی زندہ تحریک کا استعارہ ہیں جو ہر نسل کو اپنی شناخت، خودداری اور منزلِ مقصود کا احساس دلاتی ہے۔ اقبال کو سمجھنا دراصل اپنے آپ کو پہچاننا ہے، ان کے افکار سے روشنی حاصل کرنا اپنے اجتماعی مستقبل کے لیئے چراغ جلانے کے مترادف ہے۔ یہی احساس لاہور کے الحمرا ہال میں منعقدہ جشنِ اقبال کی تقریب میں پوری آب و تاب کے ساتھ جلوہ گر تھا، جہاں نوجوان اساتذہ اور طلبہ نے کلامِ اقبال کو جس جذبے، اعتماد، فکری بالیدگی اور دل نشیں انداز میں پیش کیا، اس نے یہ یقین تازہ کر دیا کہ اقبال صرف کتابوں کے اوراق میں محفوظ نہیں بلکہ نئی نسل کے دلوں میں آج بھی زندہ ہیں۔
شاعرِ مشرق علامہ محمد اقبال نے نوجوانوں کے بارے میں کہا تھا:
جوانوں کو پیروں کا استاد کر
مگر ان کو سکھا دے آدابِ فرزندی
یہ محض ایک شعر نہیں بلکہ نوجوان نسل پر اعتماد کا ایک عظیم فلسفہ ہے۔ اقبال نوجوانوں کو مستقبل کا منتظر تماشائی نہیں بلکہ مستقبل کا معمار دیکھنا چاہتے تھے۔ ان کے نزدیک نوجوان وہ قوت ہیں جو جمود کو حرکت، مایوسی کو امید اور شکست کو فتح میں بدل سکتی ہے۔ الحمرا کی تقریب میں جب نوجوان اساتذہ نے اقبال کا کلام پڑھا اور ان کے افکار کی ترجمانی کی تو یوں محسوس ہوا جیسے اقبال کی صدیوں پر محیط فکری صدا ایک نئی نسل کے لبوں سے دوبارہ بلند ہو رہی ہو۔ یہ منظر اس حقیقت کا اعلان تھا کہ اقبال کا پیغام کسی ایک زمانے، طبقے یا نسل تک محدود نہیں، بلکہ ہر دور کے انسان کے لیئے ایک زندہ رہنمائی ہے۔
اقبال نے اپنی شاعری میں خودداری، قناعت، محنت اور کردار کی بلندی کو غیر معمولی اہمیت دی۔ ان کا یہ پیغام آج بھی ہماری اجتماعی زندگی کے لیئے مشعلِ راہ ہے:
میرا طریق امیری نہیں، فقیری ہے
خودی نہ بیچ، غریبی میں نام پیدا کر
اقبال کے نزدیک اصل دولت کردار کی پختگی، فکر کی آزادی اور خودی کی سربلندی تھی۔ وہ ایسے نوجوان کی آرزو رکھتے تھے جو حالات کا غلام نہ ہو، وسائل کی کمی سے خوف زدہ نہ ہو اور اپنی صلاحیتوں کو کسی مصلحت یا مفاد کے عوض فروخت نہ کرے۔ ان کا شاہین بلند پروازی، خود اعتمادی، غیرت اور مسلسل جدوجہد کی علامت ہے۔ یہی وہ صفات ہیں جن کی آج پاکستان کو پہلے سے کہیں زیادہ ضرورت ہے۔
اقبال کے تصورِ پاکستان کو محض ایک الگ خط? زمین کے مطالبے تک محدود کر دینا ان کے فکری قد کا احاطہ کرنے کے مترادف نہیں۔ 1930ئ کے خطب? الٰہ آباد میں انہوں نے برصغیر کے مسلمانوں کے لیِے ایک الگ سیاسی وحدت کا تصور پیش کیا۔ یہ تصور دراصل ایک ایسے معاشرے کی تشکیل کی خواہش تھا جہاں مسلمان اپنی تہذیبی، مذہبی، فکری اور اجتماعی شناخت کے مطابق زندگی بسر کر سکیں۔ یہ ایک ایسا خواب تھا جس کی بنیاد آزادی، عدل، علم، خودی اور انسانی وقار پر استوار تھی۔
اقبال کی نگاہ میں ایک مثالی ریاست وہ تھی جہاں انسان آزاد ہو، علم کو عزت و تکریم حاصل ہو، نوجوان شاہین صفت ہوں، عورت کو عزت، تحفظ اور معاشرتی وقار میسر ہو اور ہر فرد اپنی خودی سے آشنا ہو۔ جہاں غربت کسی بچے کی تعلیم کے راستے میں دیوار نہ بنے، جہاں صلاحیت کو سفارش پر ترجیح حاصل ہو اور جہاں قومی ترقی کا معیار محض عمارتیں اور شاہراہیں نہیں بلکہ انسانوں کا کردار، علم اور شعور ہو۔
اسی فلسف? خودی کو اقبال نے اپنے اس لازوال شعر میں سمو دیا:

خودی کو کر بلند اتنا کہ ہر تقدیر سے پہلے

خدا بندے سے خود پوچھے، بتا تیری رضا کیا ہے

یہ خودی انسان کو غرور نہیں بلکہ خود شناسی، ذمہ داری، مسلسل جدوجہد اور اپنے مقصدِ حیات سے وابستگی کا درس دیتی ہے۔ یہی وہ فکری اساس تھی جس پر اقبال ایک زندہ، باوقار اور خوددار قوم کی عمارت تعمیر کرنا چاہتے تھے۔
1947ئ میں پاکستان معرضِ وجود میں آ گیا۔ ایک طویل جدوجہد، بے شمار قربانیوں اور لازوال عزم کے نتیجے میں ایک نئی ریاست دنیا کے نقشے پر ابھری، لیکن سوال یہ ہے کہ کیا قیامِ پاکستان کے ساتھ ہی اقبال کا خواب بھی مکمل ہو گیا تھا؟ یقیناً نہیں! پاکستان کا حصول ایک تاریخی معرکہ تھا، مگر اسے اقبال کے تصور کے مطابق ایک مثالی ریاست بنانا اس سے کہیں بڑا قومی فریضہ ہے۔ پاکستان بنانا تاریخ کا ایک عظیم باب تھا، لیکن پاکستان کو علم، انصاف، کردار، مساوات اور خودداری کا مرکز بنانا ہماری آنے والی نسلوں کی ذمہ داری ہے۔
اسی تناظر میں الحمرا کی تقریب میں تعلیم اور نوجوانوں کی تربیت کے حوالے سے سامنے آنے والے خیالات خاص اہمیت کے حامل تھے۔ وفاقی وزیر احسن اقبال نے اپنے خطاب میں بتایا کہ صوبے میں ساٹھ دانش سکول قائم ہیں جہاں غریب اور مستحق خاندانوں کے بچے اعلیٰ معیار کی تعلیم حاصل کر رہے ہیں۔ یہ امر اپنی جگہ ایک اہم پیش رفت ہے کہ معاشی محرومی کسی بچے کی ذہانت، صلاحیت اور مستقبل کی راہ میں رکاوٹ نہ بنے۔ اگر ایک غریب گھرانے کا بچہ بھی معیاری تعلیمی ماحول، جدید سہولتوں اور بہتر تربیت سے مستفید ہو تو وہ کل ملک کی قیادت، سائنس، معیشت، ادب اور سماجی ترقی میں اپنا بھرپور کردار ادا کر سکتا ہے۔
معروف صحافی مجیب الرحمٰن شامی نے تعلیم کے معیار کے حوالے سے ایک قابلِ غور تجویز پیش کرتے ہوئے کہا کہ تمام سرکاری سکولوں کو دانش سکولوں میں تبدیل کر دیا جائے تاکہ ملک بھر میں تعلیم کا معیار بلند ہو سکے۔ یہ تجویز دراصل ایک بڑے قومی مسئلے کی طرف توجہ دلاتی ہے۔ تعلیم کسی مخصوص طبقے کی میراث نہیں ہونی چاہیے بلکہ ہر بچے کا بنیادی حق اور ریاست کی اولین ترجیح ہونی چاہیے۔ اگر دانش سکولوں کا معیار پورے سرکاری تعلیمی نظام کے لیئے ایک قابلِ تقلید نمونہ بن جائے تو پاکستان کے تعلیمی منظرنامے میں ایک مثبت اور دور رس تبدیلی لائی جا سکتی ہے۔ مجیب الرحمٰن شامی کی اس صائب رائے کو بڑی پذیرائی ملی اور مسعود علی خان نے شامی صاحب کی تجویز کو بہت پسند کیا اور حقیقت ہے
اقبال کا خواب بھی تو یہی تھا کہ نوجوان محض ڈگریاں حاصل کرنے والے افراد نہ ہوں بلکہ علم و کردار کے ایسے پیکر بنیں جو اپنی قوم کو فکری، معاشی اور تہذیبی اعتبار سے آگے لے جانے کی صلاحیت رکھتے ہوں۔
معروف گلوکار اور سماجی شخصیت ابرارالحق نے اپنے منفرد اور پرجوش انداز میں ایک دلچسپ بات کہی کہ ہمارے پاس دو نہیں بلکہ تین ایٹم بم ہیں؛ ایک اسلحے کی صورت میں، دوسرا اقبال کی صورت میں اور تیسرا ہمارے نوجوانوں کی صورت میں۔ ان کا یہ جملہ تقریب کے فکری اور جذباتی ماحول میں ایک علامتی اہمیت اختیار کر گیا۔
بلاشبہ پاکستان کی دفاعی قوت ہماری قومی سلامتی کی ضمانت ہے، لیکن اقبال کی فکر ہماری نظریاتی اور فکری قوت ہے، جبکہ نوجوان اس فکر کو حقیقت میں بدلنے کی سب سے بڑی انسانی صلاحیت رکھتے ہیں۔ ایک طرف دفاعی طاقت دشمن کے عزائم کا راستہ روکتی ہے تو دوسری طرف علم، شعور اور کردار کی طاقت قوموں کو دنیا میں عزت و وقار عطا کرتی ہے۔ اقبال کی فکر اور نوجوانوں کی صلاحیت جب یکجا ہو جائیں تو یہی امتزاج پاکستان کے روشن مستقبل کی بنیاد بن سکتا ہے۔ ابرار الحق جذبات کے دریا میں بہہ گئے۔ کاش وہ اپنی نشست کو چھوڑ کر نہ جاتے تو بہت اچھا تاثر چھوڑ جاتے۔
اس تقریب کا سب سے خوبصورت اور متاثر کن پہلو نوجوانوں کی شرکت اور کلامِ اقبال سے ان کی والہانہ وابستگی تھی۔ نوجوان اساتذہ نے جب اقبال کے اشعار کو اپنے لہجے، جذبے اور اعتماد کے ساتھ پیش کیا تو محسوس ہوا کہ یہ محض ایک ادبی تقریب نہیں بلکہ نسلِ نو کے ساتھ اقبال کے فکری رشتے کی تجدید ہے۔ ہر شعر کے ساتھ ایک نیا احساس، ہر مصرعے کے ساتھ ایک نئی امنگ اور ہر آواز کے ساتھ ایک نئی امید جنم لے رہی تھی۔ بین الاقوامی شہرت یافتہ ماہرِ نفسیات سماجی سائنسدان شمیلہ ارم کا عزم بالجزم جشنِ اقبال کی تقریبات کی کامیابی اور نوجوان نسل کو مائل کر رہا ہے۔ شمیلہ ارم کی فرض شناسی اور دانش کو بہت سراہا گیا ہے۔ تقریری مقابلوں کے منصف راقم کے ساتھ پروفیسر ڈاکٹر فیصل کمال حیدری کی موجودگی انصاف کی علامت محسوس ہو رہی تھی۔
تقریری مقابلوں کی نقابت خرم مراد اہمدانی نے انجام دی اور اپنی نظامت کے ذریعے تقریب کے تسلسل، نظم اور ادبی فضا کو برقرار رکھا۔ ان مقابلوں میں نوجوانوں کی فکری صلاحیت، اظہار کی قوت اور اقبال کے کلام سے شغف نے حاضرین کو یہ سوچنے پر مجبور کیا کہ اگر نئی نسل کو درست فکری رہنمائی، معیاری تعلیم اور مثبت مواقع فراہم کیئے جائیں تو وہ ملک کے مستقبل کو ایک نئی سمت دے سکتی ہے۔
میں نے الحمرا میں یہی محسوس کیا کہ جب نوجوان اقبال پڑھتا ہے تو اس کی آنکھوں میں ایک خاص چمک پیدا ہوتی ہے۔ اس کے اندر کچھ کر گزرنے کا جذبہ بیدار ہوتا ہے۔ اسے اپنی ذات کی اہمیت، اپنی صلاحیتوں کا احساس اور اپنے وطن کے لیئے کچھ کرنے کی امنگ محسوس ہونے لگتی ہے۔ یہی چمک دراصل اقبال کے پیغام کی کامیابی ہے۔ یہی وہ روشنی ہے جو ایک نوجوان کو عام زندگی سے اٹھا کر ایک بڑے مقصد سے وابستہ کر دیتی ہے۔
اقبال نے نوجوانوں کو شاہین کا استعارہ دیا تھا، کیونکہ شاہین بلندیوں کا مسافر ہے۔ وہ دوسروں کے سہارے پر پرواز نہیں کرتا، اپنی قوتِ پرواز پر بھروسا رکھتا ہے۔ اسے محدود فضاو¿ں میں قید رہنا گوارا نہیں۔ آج کے نوجوان کو بھی اسی خود اعتمادی، فکری آزادی، محنت اور بلند ہمتی کی ضرورت ہے۔ اسے محض روزگار کی تلاش میں سرگرداں فرد نہیں بلکہ قومی تعمیر کے ایک فعال کردار کے طور پر سامنے آنا ہوگا۔
آج پاکستان کو جن چیلنجز کا سامنا ہے، ان میں تعلیمی پسماندگی، معاشی ناہمواری، عدم برداشت، اخلاقی زوال، بے روزگاری اور قومی سطح پر فکری انتشار نمایاں ہیں۔ ان مسائل کا حل محض نعروں، تقریبات اور رسمی تقاریر میں نہیں بلکہ عملی اقدامات، معیاری تعلیم، قانون کی بالادستی، میرٹ، تحقیق، تربیت اور کردار سازی میں پوشیدہ ہے۔
اقبال کو صرف نو نومبر کے دن یاد کرنا کافی نہیں۔ ان کے افکار کو نصاب، تعلیمی اداروں، گھروں، سماجی رویوں اور قومی پالیسیوں کا حصہ بنانا ہوگا۔ بچوں کو اقبال کے اشعار یاد کرانے کے ساتھ ان کے مفاہیم بھی سمجھانے ہوں گے۔ نوجوانوں کو شاہین کہنے کے ساتھ انہیں پرواز کے لیئے علم، مواقع اور اعتماد بھی فراہم کرنا ہوگا۔ عورت کو عزت دینے کے تصور کو عملی معاشرتی رویوں میں ڈھالنا ہوگا۔ غریب کے بچے کو معیاری تعلیم کی فراہمی کو محض ایک منصوبہ نہیں بلکہ قومی ذمہ داری سمجھنا ہوگا۔
یہ حقیقت فراموش نہیں کرنی چاہیے کہ قوموں کی تقدیر ان کے نوجوانوں کے ہاتھوں میں ہوتی ہے۔ اگر نوجوان تعلیم یافتہ، باکردار، باشعور اور خوددار ہوں تو کوئی رکاوٹ ان کی اجتماعی ترقی کا راستہ زیادہ دیر تک نہیں روک سکتی۔ پاکستان کی تکمیل نقشوں کی لکیروں سے نہیں، انسانوں کی تعمیر سے ہوگی؛ عمارتوں کی بلندی سے نہیں، کردار کی بلندی سے ہوگی؛ اور محض ماضی کے کارناموں پر فخر کرنے سے نہیں بلکہ مستقبل کے لیے مسلسل جدوجہد کرنے سے ہوگی۔
الحمرا کی اس تقریب نے مجھے ایک نیا احساس اور ایک خوبصورت یقین عطا کیا کہ اقبال کو نئی نسل سے جدا نہیں کیا جا سکتا۔ جب نوجوان اقبال کے اشعار پڑھتے ہیں، ان کے افکار پر گفتگو کرتے ہیں اور ان کے خوابوں کو اپنی آنکھوں میں سجاتے ہیں تو محسوس ہوتا ہے کہ اقبال کا چراغ آج بھی روشن ہے۔ ان کا پیغام آج بھی دلوں کو گرما رہا ہے اور ان کی فکر آج بھی قوم کے لیے رہنمائی کا سرچشمہ ہے۔
آئیے، ہم سب مل کر یہ عہد کریں کہ اقبال کو صرف تقریبات، سیمیناروں اور نو نومبر کے رسمی حوالوں تک محدود نہیں رکھیں گے۔ ہم انہیں اپنی زندگی، اپنے کردار، اپنے تعلیمی نظام اور اپنے قومی رویوں میں جگہ دیں گے۔ اپنے بچوں کو اقبال پڑھائیں گے، نوجوانوں کو سوال کرنے، سوچنے، تحقیق کرنے اور تخلیق کرنے کا حوصلہ دیں گے۔ ان کے اندر خودی، خودداری، احساسِ ذمہ داری اور وطن سے محبت کا جذبہ پیدا کریں گے۔
کیونکہ اقبال کا خواب ابھی ہماری اجتماعی جدوجہد کا منتظر ہے۔ پاکستان کا قیام ایک عظیم کامیابی تھی، مگر اس کی حقیقی تکمیل ابھی باقی ہے۔ یہ تکمیل اسی وقت ممکن ہوگی جب ہمارے نوجوان علم و کردار کے شاہین بن کر بلند پرواز کریں گے اور اپنی صلاحیتوں سے وطنِ عزیز کو ایک باوقار، مضبوط، منصفانہ اور ترقی یافتہ ریاست بنائیں گے۔
اور آج الحمرا میں مجھے یہی احساس ہوا کہ نوجوان صرف اقبال کے شاگرد نہیں، وہ اقبال کے خواب کے امین بھی ہیں۔ عرفان بٹ نوجوانوں کے امیر اور میرے استاد ہیں۔ اس نوجوان کے عزم بالجزم نے ہمارے دلوں میں امید کی نہیں یقین کی قندیلیں فروزاں کر دی ہیں۔نوجوانوں کا جمِ غفیر عرفان بٹ کی خوئے دلنوازی کا اسیر ہے۔ پاکستان ٹورزم کارپوریشن کے سابق مینجنگ ڈائریکٹر سی ٹی این فورم کے چیئرمین جناب مسعود علی خان نے عرفان بٹ کی کارکردگی کو شاندار الفاظ میں سراہا ہے اور ان کے لیئے نیک خواہشات اور اپنے مستحسن جذبات پہنچانے کے لیئے انہوں نے مجھے خاص طور پر ہدایت کی ہے کہ میں ان کے جذبات و احساسات عرفان بٹ کی کاوش کو جو انہوں نے پوری ریاضت سے کی ہے خراجِ تحسین پیش کر دوں ، اسی طرح انہوں نے محترمہ شمیلہ ارم کے لیئے بھی رفتارِ ک±ن کی دعا دی ہے۔ عرفان بٹ نے بہت متاثر کیا۔ ملک کے نامور صحافی مجیب الرحمٰن شامی مسلسل و تواتر سے مسعود علی خان سے نوجوانوں کے قائد عرفان بٹ کی صلاحیتوں پر بات کر رہے تھے۔اور میں تو مسلسل علامہ اقبال کا شعر جسے عرفان بٹ نے حرزِ جاں بنا رکھا گنگنا رہا تھا۔
نہیں نا امید اقبال اپنی کشتِ ویراں سے
ذرا نم ہو تو یہ مٹی بڑی زرخیز ہے ساقی
جس طرح عرفان بٹ میرے استاد ہیں اسی طرح ہال میں سارے نوجوان میرے استاد ہیں، اور یہی نوجوان پاکستان کی تکمیل کریں گے! شاعرِ مشرق علامہ اقبال کی دورس نگاہ کا یہ اعجاز دیکھیں کہ انہوں نے کتنا عرصہ پہلے کہہ دیا تھا کہ
جوانوں کو پیروں کا استاد کر
فنونِ لطیفہ کی ہر اصناف کے مقابلے ہوِئے 12 تقریری مقابلے تھے۔ مضمون نگاری یونیورسٹی اور سکول اردو اور انگریزی میں تقریری مقابلے یونیورسٹی اور سکول کے طلبا و طالبات کے درمیان مقابلے انگلش اور اردو یونیورسٹی اور سکول کے الگ الگ ہیں اور تقریری مقابلے اردو یونیورسٹی کالج الگ اور سکول الگ اس کے علاوہ کیلیگرافی، آرٹ سکول الگ یونورسٹی الگ بیت بازی سکول الگ یونیورسٹی الگ اور کو¿ز کمپٹیشن جو کہ ہال میں ہوا تھا جس میں انعام میں رقم بھی دی گئی تھی اور شاعرِ مشرق علامہ محمد اقبال کی کتابیں بھی بچوں کو دی گئی تاکہ اقبال کا نورِ بصیرت عام ہو۔ ہمارے والدین ہمارے لیئے دعا کرتے ہیں کہ اللہ تعالیٰ بچوں کو طوفانوں سے اور حادثوں سے بچائے۔ لیکن علامہ اقبال اپنے بیٹے کو کیا دعا دے رہے ہیں۔
خدا تجھے کسی طوفان سے اشنا کر دے
تیرے بحر کی موجوں میں اضطراب نہیں
پھر ڈاکٹر علامہ اقبال اپنے بیٹے کے لیئے جو دعا دیتے ہیں وہ یہ نہیں کہتے کہ میرا بیٹا 22 گریڈ کا افسر بن جائے، گورنر بن جائے ، وزیراعظم بن جائے یا صدر بن جائے۔ وہ تو اپنے بیٹے کو کہتے ہیں کہ
دیارِ عشق میں اپنا مقام پیدا کر
نیا زمانہ نئے صبح و شام پیدا کر
نوجوان قائد عرفان بٹ نے مقام پیدا کیا ہے۔ اس نے اقبال کے حقیقی شاہین ہونے کا ثبوت دیا ہے۔اس نے نیا زمانہ اور نئے صبح و شام پیدا کیئے ہیں۔

Leave a comment

آپ کا ای میل ایڈریس شائع نہیں کیا جائے گا۔ ضروری خانوں کو * سے نشان زد کیا گیا ہے