سدرہ شیخ

کیا کسی شاہراہ کو محفوظ بنانے کے لیے مزید گھروں کے چراغ بجھنے کا انتظار کیا جا رہا ہے؟ کیا کسی ماں کی گود اجڑنے، کسی باپ کے بڑھاپے کا سہارا چھننے اور کسی بچے کے یتیم ہونے کے بعد ہی متعلقہ اداروں کو اپنی ذمہ داریوں کا احساس ہوگا؟ آخر انسانی جانوں کی قیمت کتنی ہے اور اس قیمت کا تعین کون کرے گا؟شیخوپورہ سے فاروق آباد جانے والی شاہراہ آج ان سوالات کے درمیان کھڑی ہے جن کا جواب محض سرکاری بیانات، روایتی یقین دہانیوں اور کاغذی منصوبوں سے نہیں دیا جا سکتا۔ یہ راستہ اب صرف دو شہروں کے درمیان آمدورفت کا ذریعہ نہیں رہا بلکہ روزانہ ہزاروں انسانوں کے لیے ایک آزمائش بن چکا ہے۔ یہاں سے گزرنے والا ہر شخص اپنے ساتھ کسی خاندان کی امیدیں، کسی ماں کی دعائیں، کسی بچے کے خواب اور کسی گھر کی خوشیاں لے کر نکلتا ہے۔ مگر اس سفر میں اسے منزل تک پہنچنے کی فکر سے زیادہ اپنی سلامتی کی فکر لاحق رہتی ہے۔کسی شاہراہ کو مقامی لوگ جب خونی روڈ کہنا شروع کر دیں تو یہ محض ایک نام نہیں ہوتا، یہ انتظامی غفلت، بنیادی سہولتوں کی کمی اور انسانی زندگیوں سے وابستہ خدشات کی ایک تلخ داستان ہوتی ہے۔ اس نام کے پیچھے وہ گھر ہوتے ہیں جہاں کسی کے لوٹنے کا انتظار ہمیشہ کے لیے انتظار بن جاتا ہے۔ وہ مائیں ہوتی ہیں جن کی نظریں دروازے پر جمی رہ جاتی ہیں۔ وہ بچے ہوتے ہیں جنہیں شاید یہ بھی معلوم نہیں ہوتا کہ ان کے سر سے باپ کا سایہ کیوں اٹھ گیا۔ وہ خاندان ہوتے ہیں جن کی زندگی کا ایک لمحہ پوری زندگی کا دکھ بن جاتا ہے۔اس شاہراہ کا ایک انتہائی تشویش ناک حصہ نبی پورہ انڈر پاس سے آگے شروع ہوتا ہے جہاں تعلیمی اداروں، اسکولوں، کالجوں، یونیورسٹیوں اور اکیڈمیوں کی موجودگی کے باعث ٹریفک کا دباو¿ غیر معمولی ہو جاتا ہے۔ صبح کے وقت بستے اٹھائے بچوں کا ہجوم، اسکول وینز، چنگ چی رکشے، موٹر سائیکلیں، نجی گاڑیاں اور دوسری چھوٹی بڑی ٹرانسپورٹ ایک ہی سڑک پر جگہ بنانے کے لیے رواں دواں ہوتی ہیں۔ دوپہر اور شام کے اوقات میں بھی یہی صورت حال سامنے آتی ہے۔ذرا اس منظر کو محسوس کیجیے۔ ایک ماں اپنے بچے کے یونیفارم کی شکنیں درست کرتی ہے، اس کے بستے میں کتابیں رکھتی ہے، ماتھے پر پیار دیتی ہے اور اسے تعلیم حاصل کرنے کے لیے رخصت کرتی ہے۔ اسے کیا معلوم کہ جس راستے پر اس کا بچہ اپنے مستقبل کے خواب لے کر جا رہا ہے وہاں ٹریفک کا دباو¿ اور ناکافی گنجائش اس کے لیے کس قدر خطرناک صورت اختیار کر سکتی ہے۔ وہ بچہ کسی بڑے مطالبے کے لیے نہیں نکلتا، وہ صرف پڑھنے، سیکھنے اور اپنے خوابوں کی طرف بڑھنے نکلتا ہے۔ کیا ریاست اور انتظامیہ اس قدر بنیادی تحفظ بھی فراہم نہیں کر سکتیں؟یہاں مسئلہ صرف گاڑیوں کی کثرت کا نہیں بلکہ سڑک کی گنجائش اور ٹریفک کے بے ہنگم بہاو¿ کے درمیان بڑھتے ہوئے عدم توازن کا بھی ہے۔ موٹر سائیکلیں گاڑیوں کے درمیان سے راستہ تلاش کرتی ہیں، چنگ چی رکشے اچانک سمت تبدیل کرتے ہیں، بڑی گاڑیوں کی موجودگی چھوٹی گاڑیوں کے لیے مشکلات پیدا کرتی ہے اور پیدل چلنے والوں کو محفوظ گزرگاہ میسر نہ ہونے کے باعث اپنی جان خطرے میں ڈال کر سڑک عبور کرنا پڑتی ہے۔ یہ صورت حال کسی ایک فرد کی پریشانی نہیں بلکہ ایک اجتماعی مسئلہ ہے جس کا حل محض ڈرائیوروں کو احتیاط کی نصیحت کرنے سے ممکن نہیں۔آخر سوال یہ ہے کہ جب آبادی بڑھ رہی ہے، تعلیمی اداروں کی تعداد میں اضافہ ہو رہا ہے، تجارتی سرگرمیاں پھیل رہی ہیں اور روزانہ سفر کرنے والوں کی تعداد بڑھ رہی ہے تو شاہراہ کی گنجائش بڑھانے کے لیے کیا کیا گیا؟ کیا ترقی صرف نئی عمارتیں کھڑی کرنے، نئے ادارے قائم کرنے اور نئی آبادیاں بسانے کا نام ہے؟ کیا ان سب کے لیے بنیادی سہولتوں کی فراہمی کسی کی ذمہ داری نہیں؟ کیا متعلقہ محکموں کو یہ نظر نہیں آتا کہ ایک ہی راستے پر بڑھتی ہوئی ٹریفک کس قدر دباو¿ پیدا کر رہی ہے؟یہ شاہراہ صرف طلبہ کا راستہ نہیں۔ اس سے گزرنے والا کوئی مزدور ہے جو صبح اپنے بچوں کے لیے روٹی کمانے نکلتا ہے، کوئی ملازم ہے جو وقت پر دفتر پہنچنے کی کوشش کرتا ہے، کوئی مریض ہے جسے علاج کے لیے جانا ہوتا ہے اور کوئی باپ ہے جو شام کو اپنے گھر والوں کے درمیان واپس پہنچنے کی خواہش رکھتا ہے۔ ہر مسافر کسی نہ کسی گھر کی زندگی کا اہم حصہ ہے۔ کسی حادثے کا دکھ صرف متاثرہ شخص تک محدود نہیں رہتا بلکہ اس کے اثرات کئی زندگیوں کو اپنی لپیٹ میں لے لیتے ہیں۔مگر افسوس کہ ہمارے ہاں اکثر کسی مسئلے کی سنگینی اس وقت تسلیم کی جاتی ہے جب نقصان ہو چکا ہوتا ہے۔ حادثے کے بعد تعزیت کے پیغامات آتے ہیں، افسوس کا اظہار ہوتا ہے، چند روز تک تشویش ظاہر کی جاتی ہے اور پھر زندگی اپنے معمول پر لوٹ جاتی ہے۔ لیکن جس گھر کا چراغ بجھ چکا ہوتا ہے وہاں زندگی کبھی اپنے معمول پر نہیں لوٹتی۔ وہاں ایک کرسی خالی رہ جاتی ہے، ایک آواز ہمیشہ کے لیے خاموش ہو جاتی ہے اور ایک انتظار ایسا شروع ہوتا ہے جس کی کوئی آخری تاریخ نہیں ہوتی۔کیا انتظامیہ کی ذمہ داری صرف حادثے کے بعد کارروائی کرنا ہے یا حادثات کے امکانات کم کرنے کے لیے پہلے سے اقدامات کرنا بھی اس کے فرائض میں شامل ہے؟ کیا محکمہ شاہرات کا کام صرف سڑکوں کی تعمیر اور مرمت تک محدود ہے؟ کیا ٹریفک پولیس کی ذمہ داری صرف چالان کرنے تک ہے یا اسے ٹریفک کی منصوبہ بندی، روانی اور شہریوں کے تحفظ میں بھی اپنا کردار ادا کرنا چاہیے؟ اور سب سے اہم سوال یہ کہ اگر متعلقہ اداروں کو اس شاہراہ کے مسائل کا علم ہے تو پھر اب تک مو¿ثر پیش رفت کیوں دکھائی نہیں دیتی؟حکومت پنجاب، ضلعی انتظامیہ، محکمہ شاہرات اور ٹریفک پولیس کو اب اس معاملے کو معمول کی شکایت سمجھ کر نظرانداز کرنے کے بجائے اسے انسانی جانوں کے تحفظ کا سنجیدہ مسئلہ تسلیم کرنا ہوگا۔ شیخوپورہ، فاروق آباد شاہراہ کا تکنیکی اور ٹریفک سروے کیا جائے۔ موجودہ گنجائش، روزانہ ٹریفک کے دباو¿ اور مستقبل کی ضروریات کو سامنے رکھتے ہوئے اسے دو رویہ کرنے کا باقاعدہ منصوبہ بنایا جائے۔ اس منصوبے کے لیے فنڈز، منظوری اور تعمیراتی مراحل کے حوالے سے واضح حکمت عملی سامنے لائی جائے تاکہ شہریوں کو محض وعدے نہیں بلکہ عملی پیش رفت دکھائی دے۔جب تک مستقل توسیع کا منصوبہ مکمل نہیں ہوتا، اس وقت تک عبوری اقدامات بھی فوری طور پر ضروری ہیں۔ تعلیمی اداروں کے اوقات میں ٹریفک اہلکاروں کی تعیناتی، رفتار کو قابو میں رکھنے کے مو¿ثر انتظامات، مناسب سائن بورڈز، پیدل چلنے والوں کے لیے محفوظ گزرگاہیں، ٹریفک قوانین پر سختی سے عمل درآمد اور بھاری گاڑیوں کی آمدورفت کی مناسب نگرانی یقینی بنائی جائے۔ یہ کوئی غیر معمولی مطالبات نہیں بلکہ شہریوں کی بنیادی سلامتی سے متعلق تقاضے ہیں۔یہ بھی پوچھنا ضروری ہے کہ کیا کسی بڑے حادثے کے بعد ہی اس شاہراہ کو حکومتی ترجیحات میں جگہ ملے گی؟ کیا کسی طالب علم کے ساتھ پیش آنے والا المیہ اس وقت زیادہ اہم ہوگا جب اس کی خبر اخبارات کی سرخی بن جائے گی؟ کیا کسی مزدور کے گھر میں ماتم بپا ہونے کے بعد ہی یہ احساس پیدا ہوگا کہ سڑک کی گنجائش ناکافی تھی؟ آخر وہ کون سا مرحلہ ہے جہاں پہنچ کر انسانی زندگی انتظامی ترجیحات میں شامل ہوگی؟شیخوپورہ اور فاروق آباد کے شہری کوئی شاہانہ سہولت نہیں مانگ رہے۔ وہ کسی کے خلاف محاذ آرائی نہیں کر رہے۔ ان کا مطالبہ نہ سیاسی ہے نہ ذاتی مفاد پر مبنی۔ وہ صرف ایک ایسی شاہراہ چاہتے ہیں جہاں سے ان کے بچے اسکول جا سکیں، ان کے بزرگ سفر کر سکیں، ان کے گھر کے کفیل روزگار کے لیے نکل سکیں اور ہر مسافر اپنی منزل تک پہنچنے کے بعد اپنے گھر والوں کے درمیان خیریت سے واپس لوٹ سکے۔ترقی کے بڑے بڑے دعوے اپنی جگہ، مگر ایسی ترقی کا کیا فائدہ جس کے راستوں پر انسان خود کو غیر محفوظ محسوس کرے؟ تعلیمی اداروں کی عمارتیں بلند ہوتی رہیں اور ان تک پہنچنے والے راستے خطرات سے بھرے رہیں تو یہ کیسا ترقیاتی تصور ہے؟ نئی آبادیاں بستی رہیں اور ان کے لیے بنیادی سفری سہولتیں فراہم نہ ہوں تو منصوبہ بندی کے دعوے کس بنیاد پر کیے جا رہے ہیں؟یہ شاہراہ اب مزید وعدوں، رسمی جائزوں اور فائلوں میں دفن منصوبوں کی متحمل نہیں ہو سکتی۔ اس کے مسائل کو ترجیحی بنیادوں پر حل کرنا ہوگا۔ متعلقہ حکام کو شہریوں کے سامنے جواب دہ ہونا چاہیے کہ دو رویہ شاہراہ بنانے کے لیے اب تک کیا اقدامات کیے گئے ہیں اور آئندہ عملی پیش رفت کب تک متوقع ہے۔یاد رکھیے، سڑک پر سفر کرنے والا انسان محض ایک گاڑی کا حصہ یا ٹریفک کا ایک عدد نہیں ہوتا۔ وہ کسی ماں کی دعا، کسی باپ کا سہارا، کسی بہن کا بھائی، کسی بچے کا مستقبل اور کسی خاندان کی پوری کائنات ہوتا ہے۔ جب وہ گھر سے نکلتا ہے تو اس کے پیچھے کئی آنکھیں اس کی واپسی کی منتظر ہوتی ہیں۔ اگر وہ واپس نہ لوٹے تو صرف ایک مسافر نہیں کھوتا، ایک گھر اپنی ہنسی، ایک خاندان اپنا سہارا اور کئی زندگیاں اپنا سکون کھو دیتی ہیں۔اب وقت آ گیا ہے کہ حادثات کے بعد تعزیتی بیانات جاری کرنے کے بجائے حادثات سے پہلے انسانی جانوں کے تحفظ کا بندوبست کیا جائے۔ ماتم کرنے والے خاندانوں کو تسلی دینے سے بہتر ہے کہ ایسے حالات ہی پیدا نہ ہونے دیے جائیں جو کسی گھر کو عمر بھر کے ماتم میں مبتلا کر دیں۔شیخوپورہ، فاروق آباد شاہراہ کو دو رویہ کیا جائے۔یہ مطالبہ کسی آسائش، سیاسی رعایت یا ترقیاتی نمودونمائش کا نہیں۔ یہ ان انسانوں کی زندگیوں کا سوال ہے جو ہر صبح اس شاہراہ پر سفر کرتے ہیں اور شام کو اپنے پیاروں کے درمیان واپس لوٹنا چاہتے ہیں۔آخر کتنے مزید نوحوں کے بعد یہ شاہراہ محفوظ بنائی جائے گی؟