جاویدایازخان

گذشتہ روز دو خبروں نے توجہ اپنی جانب مبذول کر لی پہلی خبر گوجرانوالہ کے ایک گاوں کے تیئس سالہ نوجوان اور چیک ریپبلک کی پینسٹھ سالہ خاتون کی تھی جن کی محبت فیس بک سے شروع ہوکرایک طویل محبت کے بعد رنگ لائی اور وہ اپنے اس بےجوڑ عشق کو شادی میں تبدیل کرنے میں کامیاب ہوے ۔یہ کہانی عمر کے فرق ،محبت ،فاصلے اور شادی کے حوالے سے سوشل میڈیا پر بحث کا موضوع بن گئی ہے۔دوسری خبر کلر کہار کے ایک قوت سماعت اور آواز سے محروم نوجوان نبیل کی اٹلی کی دوشیزہ سے ایسی ہی لازوال محبت کی شادی کی ہے جہاں دلچسپ بات یہ ہےکہ دولہے کےاتھ ساتھ دولہن بھی قوت سماعت اور بولنے کی قوت سے محروم ہے۔اللہ ان کو زندگی کی خوشیاں مبارک فرماے آمین !۔بےشک دلوں کے رشتے کسی چیز کے محتاج نہیں ہوتے اوراس شادی سےیہ بھی ثابت ہوگیا کہ محبت کےلیے اشارے ہی کافی ہیں کیونکہ یہ دونوں پچھلے چھ سال سےانسٹا گرام پر اشاروں اشاروں میں عشق کر رہے تھے۔یوں اشاروں کی زبان سے شروع محبت شادی تک پہنچ گئی ! پس ثابت ہوا کہ عشق اور محبت کے لیے رنگ ونسل ،مذہب ،قوم کے ساتھ ساتھ عمر اور ملک کی سرحدیں بلکہ اب تو شاید سننے اور بولنے کی صلاحیت بھی کچھ اہمیت نہیں رکھتیں۔جی ہاں ! ایسی ہی عجیب شادیوں اور محبتوں کی خبریں آے دن میڈیا کی زینت بنتی رہتی ہیں۔ ہمارے ایک دوست کا خیال ہے کہ یہ عشق کا دروازہ بھی عجیب ہے کہیں تو یہ لمحوں میں بنا کسی دستک کے کھل جاتا ہے اور کوئی ساری عمر اس دروازے پردستک دیتا رہتا ہے مگر جواب نہیں آتا۔ ان حالات میں محبت اور عشق کا کوئی لائسنس ہونا ضرور چاہیے کیونکہ اب دنیا کے انداز اور حالات بدل رہے ہیں تو سوال یہ ہے کہ بات جب قوم ،مذہب ،زبان ،سماعت کے ساتھ ساتھ عمروں اور سرحدوں سے بھی آگے نکل جاے تو کیا کرسکتے ہیں ؟ محبت اور عشق ازل سے ہی ہر چیز سے بےنیاز رہے ہیں۔یہ دیوانے کب دنیاوی حدود وقیود کے پابند رہتے ہیں ؟ بلکہ آج تو عشق کی میراتھن کے اس ٹریک پر مرد ،خواتین ،بزرگ اور بچے سب ہی قسمت آزماتے ہیں۔نازک دلوں کے معاملات اب شاید ان کےاپنے بس میں بھی نہیں رہے کیونکہ اس محبت کی میراتھن ریس میں دوڑنے کا کوئی معیار مقرر نہیں ہوتابلکہ جو چاہے ،جب چاہے ،جہاں چاہے اس دوڑ کا حصہ بن جاتا ہے۔مگر سب کہاں جیت پاتے ہیں ؟ گو "عشق کا لائسنس ” کے عنوان میں بظاہر مزاح بھی ہے ،معاشرتی تنقید بھی اور ایک سنجیدہ اور اہم سوال بھی چھپا ہوا ہے مگر سوال یہ ہے کہ کیا محبت اور عشق کے نام پر ہر عمر ،ہر رشتے اور ہر حد کو عبور کرنے کی آزادی ہونی چاہیے ؟ گذشتہ روز میرے ایک بہت ہی بزرگ اور اچھے دوست نے موجودہ حالات اور خصوصی سوشل میڈیا میں پیش آنے والے واقعات کے بارے میں یہی عجیب سا سوال بھی کیا اور تجویذ بھی دی کہ اب عشق کرنے سے پہلے عشق کا لائسنس لینا ضروری ہونا چاہیے اور اس کے لیے چند شرائط طے ہونا بھی ضروری ہیں جن پر پورا اتر کرہی یہ لائسنس جاری کیا جاسکے کیونکہ اب عشق کرنے کی کوئی عمر اور حد تو رہی نہیں ہے اور نہ سوچنے سمجھنے کی ضرورت ہی باقی ہے۔ ایسے حالات میں خیال آتا ہے کہ جب گاڑی چلانے کے لیے ڈرائیونگ لائسنس، کاروبار کے لیے اجازت نامہ، اسلحہ رکھنے کے لیے لائسنس اور بعض پیشوں کے لیے باقاعدہ سند درکار ہوتی ہے تو پھر عشق جیسا حساس معاملہ اتنا آزاد کیوں ہے؟ کیا عشق کرنے والوں کے لیے بھی کوئی لائسنس ہونا چاہیے؟یا پھر” انےواہ "یعنی "اندھا دھند "عشق کرنے دیا جانا چاہیے ؟آج کا جدید عشق سوشل میڈیا کی نئی منڈیوں میں خوب پھلتا پھولتا دکھائی دیتا ہے۔ عشق کے لیے نہ محلے کی گلی ضروری رہی، نہ کالج کا راستہ، نہ کسی تقریب میں اتفاقاً ملاقات کی ضرورت ہے۔ موبائل فون کی ایک اسکرین نے دنیا بھر کے دلوں کو ایک دوسرے کے سامنے لا کھڑا کیا ہے۔ اب دوستی کے لیے ہمسائیگی، محبت کے لیے ہم عمری اور تعلق کے لیے کسی تعارف کی شرط بھی باقی نہیں رہی۔ دنیا بھر کے کم عمر بچے اور بچیاں ہی نہیں بوڑھے بھی اپنے سے دوگنی چھوٹی یا بڑی عمر کے افراد سے جذباتی وابستگیاں قائم کر لیتے ہیں اور کبھی ہزاروں میل دور کسی اجنبی ملک میں بیٹھے شخص کو اپنا ہم راز اور ہم سفر سمجھنے لگتے ہیں۔ ایک زمانہ تھا جب عشق کرنے کے لیے بھی کچھ عمریں مخصوص سمجھی جاتی تھیں۔ جوانی کی دہلیز پر قدم رکھتے ہی دل میں جذبات کے چراغ روشن ہوتے تھے اور محبت کو زندگی کے حسین خوابوں سے جوڑا جاتا تھا۔ مگر اب زمانہ بدل چکا ہے۔ عشق نے عمر کی تمام روایتی حد بندیاں توڑ دی ہیں۔ نہ سفید بال رکاوٹ ہیں، نہ پختہ عمر کوئی عذر، نہ زندگی کے تجربات اور نہ ہی معاشرتی ذمہ داریاں! اب کوئی کسی بھی عمر میں کسی بھی عمر کے شخص پر دل ہار سکتا ہے۔ یوں محسوس ہوتا ہے جیسے عشق بھی جدید دور کی سہولت بن گیا ہے، جس کے استعمال کے لیے نہ عمر کی پابندی ہے اور نہ کسی اہلیت کا معیار ہی باقی ہے۔ اب عشق کے لیے نہ عمر دیکھی جاتی ہے، نہ فاصلہ ناپا جاتا ہے، نہ شناخت کی تصدیق ہوتی ہے؛ بس دور دیس سے ایک فرینڈ ریکویسٹ آتی ہے، چند میٹھے پیغامات کا تبادلہ ہوتا ہے اور دل کسی انجان دیس کے انجانے شخص کے نام کر دیا جاتا ہے اور شاید آج واقعی ہمیں عشق کا لائسنس جاری کرنے سے پہلے اپنے بچوں کو یہ سکھانے کی ضرورت ہے کہ ہر دوستی محبت نہیں ہوتی، ہر محبت سچی نہیں ہوتی اور ہر مسکراتا چہرہ قابلِ اعتماد نہیں ہوتا۔سوشل میڈیا نے دنیا کو ایک گاو¿ں ضرور بنا دیا ہے، لیکن اس گاو¿ں میں ہر شخص قابلِ اعتماد نہیں۔ خوب صورت پروفائل، دلکش تصاویر، میٹھی گفتگو اور بیرونِ ملک رہائش کا تاثر بعض نوجوانوں کے لیے کشش کا سبب بن جاتا ہے۔ انہیں یہ اندازہ نہیں ہوتا کہ اسکرین کے دوسری طرف موجود شخص کی اصل شناخت، عمر، کردار اور نیت کیا ہے۔ کہیں یہ دوستی جذباتی استحصال کا ذریعہ بن جاتی ہے، کہیں بلیک میلنگ اور دھوکا دہی کا، اور کہیں نوجوان اپنے خاندان اور حقیقی زندگی سے دور ہوتے چلے جاتے ہیں۔ یہاں سوال صرف عشق کرنے یا عمر کے فرق کا نہیں بلکہ کم عمری، ناپختہ ذہن، عدم تحفظ اور اعتماد کے غلط استعمال کا بھی ہے۔ والدین کے لیے بھی یہ ایک نیا امتحان اور لمحہ فکریہ ضرور بنتا ہے کہ وہ بچوں پر محض پابندیاں لگانے کے بجائے انہیں ڈیجیٹل دنیا کے خطرات، اجنبی افراد کی چالوں اور جذباتی استحصال سے کیسے آگاہ کریں؟ چند سوالات جو اس تحریر کو مزید مو¿ثر بنا سکتے ہیں کہ کیا بیرونِ ملک رہنے والا ہر شخص قابلِ اعتماد سمجھ لیا جائے؟ کیا سوشل میڈیا پر دوستی کے نام پر عمر اور شناخت چھپانا آسان نہیں ہو گیا؟ کیا کم عمر بچوں کو محبت اور جذباتی استحصال کے درمیان فرق معلوم ہے؟ کیا والدین اپنے بچوں کی ڈیجیٹل زندگی سے واقف ہیں؟ کیا آج کا میڈیا ،ڈرامے اور فلمیں ننھے اور بوڑھے دماغوں کو بیک وقت متاثر نہیں کر رہے ؟کیا عشق کے نام پر کسی کی کم عمری اور ناپختگی سے فائدہ اٹھانے والوں کا احتساب نہیں ہونا چاہیے؟کہیں یہ سب گھریلو جھگڑوں اور ناچاتی کی وجہ تو نہیں بن رہے ؟ہمارے جواب مختلف ہوسکتے ہیں مگراس سے انکار نہیں کہ ان خطرات کے بادل ہر جانب منڈلا رہے ہیں۔تاہم ایک سوال اپنی جگہ موجود ہے کہ کیا عشق واقعی کسی لائسنس، سرٹیفکیٹ یا سرکاری اجازت نامے کا محتاج ہے؟ شاید نہیں! کیونکہ عشق تو دل کا معاملہ ہے، لیکن دل کے معاملات میں بھی اخلاقیات، رضامندی، احترام اور ذمہ داری کی پابندی ضروری ہے۔ عمر کا فرق بذاتِ خود محبت کو غلط نہیں بناتا، لیکن کسی کی کم عمری، مجبوری یا جذباتی کمزوری سے فائدہ اٹھانا یقیناً قابلِ مذمت ہے۔ سو عشق کا لائسنس جاری ہو یا نہ ہو، مگر اس کے لیے ایک اخلاقی شرط لازمی ہونی چاہیے کہ دل لگانے سے پہلے دل رکھنے والے انسان کی عزت، احساسات اور زندگی کا خیال رکھنا سیکھا جائے۔آخر میں شاید یہ کہنا ہی کافی ہے کہ اگرچہ عشق پر پابندی نہیں ہونی چاہیے مگر عشق کے نام پر کسی کی زندگی برباد کرنے کی آزادی بھی نہیں ہونی چاہیے۔