آپا منزہ جاوید

گرمیوں کی آمد کے ساتھ ہی تعلیمی اداروں میں چھٹیاں شروع ہو جاتی ہیں اور ہر گھر میں سیر و تفریح کے منصوبے بننے لگتے ہیں۔ کوئی پہاڑوں کی ٹھنڈی فضاو¿ں کا رخ کرتا ہے کوئی سرسبز وادیوں اور جھیلوں کی دلکشی میں سکون تلاش کرتا ہےجبکہ بچے ان دنوں کا بے چینی سے انتظار کرتے ہیں تاکہ روزمرہ کی مصروفیات سے نکل کر قدرت کے حسین مناظر سے لطف اندوز ہو سکیں۔ یقیناً سیر و تفریح جسمانی اور ذہنی تازگی کا بہترین ذریعہ ہے لیکن افسوس کہ ہر سال یہی خوشیاں بعض خاندانوں کے لیے عمر بھر کا غم بن جاتی ہیں۔اکثر خبریں سننے کو ملتی ہیں کہ کسی سیاحوں کی گاڑی گہری کھائی میں جا گری، کہیں لینڈ سلائیڈنگ نے راستے بند کر دیے، کہیں اچانک آنے والے سیلابی ریلے نے قیمتی جانیں نگل لیں اور کہیں دریا کے کنارے ایک لمحے کی بے احتیاطی نے پورے خاندان کو سوگوار کر دیا۔ یہ محض خبریں نہیں ہوتیں بلکہ کئی گھروں کے اجڑ جانے کی دردناک داستانیں ہوتی ہیں۔ ایسے ہر واقعے کے بعد دل یہی سوال کرتا ہے کہ اگر تھوڑی سی احتیاط کر لی جاتی تو شاید یہ سانحہ پیش نہ آتا۔تفریح کا مقصد خوشی حاصل کرنا قدرت کی خوبصورتی سے لطف اندوز ہونا اور اپنے پیاروں کے ساتھ یادگار لمحات گزارنا ہے، نہ کہ اپنی جان اور دوسروں کی زندگی کو خطرے میں ڈال دینا۔ اس لیے ضروری ہے کہ سفر کا آغاز مکمل منصوبہ بندی کے ساتھ کیا جائے۔روانگی سے پہلے گاڑی کی مکمل جانچ کر لینا انتہائی ضروری ہے۔ ٹائروں، بریک، انجن آئل، ایندھن اور دیگر ضروری حصوں کی اچھی طرح پڑتال کر لی جائے تاکہ راستے میں کسی ناخوشگوار صورتحال کا سامنا نہ کرنا پڑے۔ گاڑی میں ابتدائی طبی امداد کا بکس، ٹارچ ‘پاور بینک، اضافی پانی خشک خوراک، موسم کے مطابق اضافی کپڑے اور اگر پہاڑی علاقے کی طرف جا رہے ہوں تو ہلکی گرم چادر یا کمبل ضرور موجود ہونا چاہیے۔ اسی طرح اپنی روزمرہ استعمال ہونے والی ادویات بھی مناسب مقدار سے زیادہ ساتھ رکھنی چاہئیں تاکہ غیر متوقع تاخیر کی صورت میں پریشانی نہ ہو۔سفر سے پہلے موسم کی صورتحال سے آگاہی بھی بے حد ضروری ہے۔ بارشوں، لینڈ سلائیڈنگ یا سیلاب کی پیش گوئی کی صورت میں سفر مو¿خر کر دینا ہی دانشمندی ہے۔ پہاڑی علاقوں میں موسم چند لمحوں میں تبدیل ہو جاتا ہے، اس لیے احتیاط ہی بہترین حفاظت ہے۔ اگر ممکن ہو تو روانگی سے پہلے رہائش کا انتظام کر لیا جائے تاکہ منزل پر پہنچ کر غیر ضروری مشکلات کا سامنا نہ کرنا پڑے۔محفوظ سفر کے لیے ڈرائیور کا ذمہ دارانہ رویہ بنیادی اہمیت رکھتا ہے۔ ڈرائیونگ کے دوران مکمل توجہ سڑک پر ہونی چاہیے۔ موبائل فون کا استعمال اور غیر ضروری گفتگو ڈرائیور کی توجہ منتشر کر کے حادثے کا سبب بن سکتی ہے۔ پہاڑی راستوں پر غیر ضروری اوورٹیک تیز رفتاری اور جلد بازی سے ہر ممکن گریز کرنا چاہیے۔ یاد رکھنا چاہیے کہ گاڑی میں صرف مسافر نہیں بلکہ کئی قیمتی زندگیاں دعائیں اور امیدیں سفر کر رہی ہوتی ہیں۔قدرتی مقامات خصوصاً دریاو¿ں، جھیلوں اور آبشاروں کے کنارے بے احتیاطی جان لیوا ثابت ہو سکتی ہے۔ صرف ایک خوبصورت تصویر یا ویڈیو بنانے کی خواہش میں خطرناک مقامات تک جانا کسی بھی صورت دانشمندی نہیں۔ پانی کے کنارے مناسب فاصلہ رکھنا چاہیے کیونکہ ایک لمحے کی لغزش ناقابلِ تلافی نقصان کا باعث بن سکتی ہے۔ بچوں پر خصوصی نظر رکھنا بھی والدین کی اہم ذمہ داری ہے کیونکہ چند لمحوں کی غفلت بڑے سانحے کو جنم دے سکتی ہے۔لباس اور جوتوں کا انتخاب بھی سفر کی نوعیت کے مطابق ہونا چاہیے۔ پہاڑی راستوں پر مضبوط اور بند جوتے پہننا زیادہ محفوظ رہتا ہے جبکہ ڈھیلے یا پھسلنے والے جوتے حادثات کا سبب بن سکتے ہیں۔ موسم کے مطابق لباس نہ صرف آرام فراہم کرتا ہے بلکہ اچانک بدلتے ہوئے حالات میں بھی حفاظت کا ذریعہ بنتا ہے۔اگر کسی فرد کو بلڈ پریشر شوگر دمہ یا کسی اور دائمی بیماری کا مسئلہ ہو تو اس کی تمام ضروری ادویات ساتھ رکھنا لازمی ہے۔ ممکن ہو تو بلڈ پریشر چیک کرنے والی مشین اور شوگر چیک کرنے والا آلہ بھی ساتھ موجود ہو تاکہ ضرورت پڑنے پر فوری مدد حاصل کی جا سکے۔بدقسمتی سے ہر سال پیش آنے والے بیشتر حادثات قدرت کی سختی سے زیادہ انسانی غفلت کا نتیجہ ہوتے ہیں۔ تیز رفتاری موسم کی وارننگ کو نظر انداز کرنا خطرناک مقامات پر جانا اور حفاظتی اصولوں کو معمولی سمجھنا ایسے اسباب ہیں جن سے بچ کر بے شمار قیمتی جانیں محفوظ بنائی جا سکتی ہیں۔قدرت کی حسین وادیوں، بہتے چشموں، بلند پہاڑوں اور سرسبز میدانوں سے لطف اندوز ہونا یقیناً زندگی کی خوبصورت نعمت ہے، لیکن اس نعمت کا حقیقی لطف اسی وقت حاصل ہوتا ہے جب ہم احتیاط، ذمہ داری اور شعور کو اپنا ساتھی بنائیں۔ چند لمحوں کی بے احتیاطی عمر بھر کی پشیمانی بن سکتی ہے، جبکہ چند لمحوں کی منصوبہ بندی اور احتیاط ایک عام سفر کو خوشگوار اور یادگار بنا دیتی ہے۔ آئیے اس موسمِ گرما میں خوبصورت یادیں سمیٹیں، اپنے پیاروں کے ساتھ خوشیاں بانٹیں اور اپنی جان کے ساتھ دوسروں کی زندگی کے تحفظ کو بھی اپنی اولین ذمہ داری سمجھیں، کیونکہ محفوظ سفر ہی خوشگوار سفر ہوتا ہے۔اللہ تعالیٰ آپ کے قلم کو مزید قوت، حکمت اور تاثیر عطا فرمائےاور آپ کی تحریروں کو معاشرے کے لیے نفع بخش بنائے۔(آمین)