تحریر: رخسانہ سحر

چھوٹے شہروں کی شامیں عموماً ایک سادگی اور بے نیازی لیے ہوتی ہیں، مگر کبھی کبھار یہی معمولی سی شامیں تاریخ کے سنہری اوراق پر اپنا نشان چھوڑ جاتی ہیں۔ چوک سرور شہید کی ایک ایسی ہی خوشبو میں بسی ہوئی شام تھی، جب بزمِ دستارِ ادب کے زیرِ اہتمام پریس کلب میں ایک شاندار، پروقار اور یادگار ادبی تقریب کا انعقاد ہوا۔ ایسا محسوس ہوتا تھا کہ جیسے پورا شہر لفظوں کے احترام میں خاموش کھڑا ہے، اور فضا میں شعر و سخن کی لطیف لہریں بہہ رہی ہیں۔

یہ تقریب دراصل دو اہم کتابوں
عابد علیم سہو کے نئے غزلیہ مجموعے “اس پار“
اور
اسلام آباد کی معروف افسانہ نگار’ کالم نگار’ شاعرہ رخسانہ سحر کے افسانوی مجموعے “خامشی کا شور“
کی رونمائی کے لیے ترتیب دی گئی تھی، مگر اس کی معنویت محض ’’کتابوں کی رونمائی‘‘ تک محدود نہیں رہی۔ یہ ایک پورے ادبی شعور کی بیداری کا دن تھا، جس میں مختلف شہروں سے آئے ہوئے شعراء، لکھاری، دانشور اور اہلِ ادب شریک تھے۔

تقریب کی صدارت اٹلی سے تشریف لائے گلوبل روئٹرز ایسوسی ایشن کے صدر محمد نواز گلیانہ نے کی۔ ان کی موجودگی نے اس محفل کو بین الاقوامی وقار بخش دیا۔ نظامت کے فرائض بزمِ دستارِ ادب کے چیئرمین سجاد حسین راز نے نہایت خوبصورتی، سلیقے اور ادبی شگفتگی کے ساتھ ادا کیے۔ ان کی گفتگو بارش کی پہلی بوند کی طرح دلوں کو تازگی بخشتی گئی۔

مہمانانِ خاص میں سابق ایم پی اے چوہدری احسان الحق نولاٹیہ، معروف پنجابی شاعر محمد بوٹا شاکر، بھکر کی ممتاز شاعرہ فہیمہ شیرازی اور ملتان سے آئے ہوئے محمد یاسر شامل تھے۔ اس کے ساتھ ساتھ شہظل خان دائرہ دین پناہ، اسد رضا سحر احمدپور سیال اور حکیم منصور عالم فتح پور نے بھی مہمانانِ اعزاز کی حیثیت سے شرکت کر کے محفل کی علمی و ادبی شان میں اضافہ کیا۔

یہ وہ مقام تھا جہاں لفظ مچل رہے تھے، جذبات سانس لے رہے تھے اور سامعین اپنے وجود سمیت ایک عالمِ خیال میں ڈوبتے جا رہے تھے۔ مقامی شاعروں نے اپنے خوبصورت اور اثر انگیز کلام سے محفل کو ایسی روانی بخشی کہ ہر سر جھوم اٹھا۔ بارہا تالیاں گونجتی رہیں۔ کہیں غزل کا درد تھا، کہیں نظم کا التفات، اور کہیں شعر کے اندر چھپی ہوئی صدیوں کی حکمت۔

عابد علیم سہو کی کتاب “اس پار“ کے حوالے سے جس طرح گفتگو ہوئی، اس نے یہ تاثر گہرا کر دیا کہ وہ صرف ایک شاعر نہیں بلکہ دل کی زبان بولنے والا حساس انسان ہے۔
رخسانہ سحر کی کتاب “خامشی کا شور“ پر اہلِ دانش نے جس سنجیدگی سے اظہارِ خیال کیا، اس نے بتایا کہ یہ محض افسانوں کا مجموعہ نہیں، بلکہ عورت کے دل میں دبی ہوئی صدیوں کی سسکیاں اور سماج سے مکالمہ کرتی ہوئی ایک پوری دنیا ہے۔

مشاعرہ نہایت پرجوش ماحول میں اپنے اختتام کو پہنچا، مگر محفل کا ذائقہ دیر تک دلوں میں رس گھولتا رہا۔ آخر میں تمام مہمانوں کے اعزاز میں چوہدری احسان الحق نولاٹیہ کے ڈیرہ پر پرتکلف عشائیے کا اہتمام کیا گیا، جہاں مہمانوں کو اعزازی شیلڈز پیش کی گئیں اور ان کی ادبی خدمات کو خراجِ تحسین پیش کیا گیا۔

یہ محفل محض ایک تقریب نہیں تھی،
یہ اس بات کا اعلان تھی کہ ادب ابھی زندہ ہے،
لفظوں کی حرارت باقی ہے،
اور چوک سرور شہید جیسے مقامات آج بھی علم و فن کی روشنی سے منور ہو سکتے ہیں۔

ادبی حلقوں نے اس تقریب کو علاقے میں صحت مند، معتبر اور سنجیدہ ادبی سرگرمیوں کے فروغ کے لیے سنگِ میل قرار دیا ہے۔
یقیناً ایسی محفلیں ہمارے معاشرے میں تازہ ہوا کے جھونکے کی مانند ہیں
جو بتاتی ہیں کہ جہاں کتابوں کی خوشبو ہو، وہاں روشنی کبھی ختم نہیں ہوتی۔