شاہد نسیم چوہدری

ادب کی دنیا میں کچھ محفلیں محض شعر و سخن کی نشست نہیں ہوتیں بلکہ وہ محبت، عقیدت، روحانیت اور تہذیبی تسلسل کی ایسی روشن علامت بن جاتی ہیں جن کی خوشبو دیر تک محسوس کی جاتی ہے۔ بالخصوص جب موضوعِ سخن ذاتِ مصطفیٰ ہو تو لفظوں کی معنویت بدل جاتی ہے، احساسات کو ایک نئی وسعت ملتی ہے اور شعری اظہار عقیدت کے ایسے چراغ روشن کرتا ہے جن کی روشنی دلوں تک اترتی چلی جاتی ہے۔ نعت گوئی درحقیقت وہ سعادت ہے جس میں شاعر اپنے فن، فکر اور قلبی وابستگی کو بارگاہِ رسالت مآب میں نذرانہ محبت کے طور پر پیش کرتا ہے۔فیصل آباد، جسے بجا طور پر شہرِ نعت بھی کہا جاتا ہے، اس حوالے سے ایک منفرد ادبی شناخت رکھتا ہے۔ یہاں نعتیہ ادب کی ترویج، فروغِ عشقِ رسولﷺ اور اہلِ سخن کی تربیت کے لیے مختلف ادبی حلقے اپنی خدمات انجام دے رہے ہیں۔ انہی قابلِ قدر روایات کا ایک خوبصورت حوالہ انجمنِ فقیرانِ مصطفیٰ ہے، جس نے مسلسل ادبی و روحانی سرگرمیوں کے ذریعے نعتیہ مشاعروں کی ایک قابلِ رشک روایت قائم کر رکھی ہے۔اسی سلسلے کی ایک یادگار کڑی 31 اکتوبر 2026ء بروز ہفتہ غلام محمد آباد، فیصل آباد کے اعوان نعت محل میں منعقد ہونے والا انجمنِ فقیرانِ مصطفیٰ کا 281 واں ماہانہ طرحی نعتیہ مشاعرہ تھا۔ تقریباً چار گھنٹے جاری رہنے والی اس بابرکت محفل میں شہر اور گردونواح کے اہلِ سخن نے شرکت کرکے اپنے اپنے انداز میں بارگاہِ رسالت ﷺ میں عقیدت کے پھول پیش کیے۔ محفل کا ماحول محبت، احترام اور روحانی وابستگی کی خوشبو سے معطر رہا۔اس مشاعرے کی ایک خوبصورت خصوصیت یہ تھی کہ نعتیہ کلام کے ساتھ منقبت کے لیے بھی ایک الگ طرحی مصرع مقرر کیا گیا تھا۔ پنجابی نعت کے لیے معروف شاعر محمد جمیل چشتی کا مصرع:
”آ دل دا وضو کر کے سرکار دی گل کرئیے“
منتخب کیا گیا، جب کہ غازی علم الدین شہید کی 98ویں برسی کے حوالے سے منقبت کا مصرع:
”علم دین غازی جان اپنی نوں نبی پاک توں کرن قربان والا“
شعراء کی تخلیقی صلاحیتوں کو اظہار کا موقع فراہم کرتا رہا۔ ان دونوں مصرعوں میں ایک طرف عشقِ رسول ﷺکی وارفتگی اور دوسری طرف ناموسِ رسالت ﷺ کے لیے قربانی دینے والے عظیم کردار سے وابستگی کا جذبہ نمایاں تھا۔اس محفل کی صدارت معروف پنجابی شاعر محمد جمیل چشتی نے کی، جب کہ صاحبزادہ توصیف حیدر چشتی مہمانِ خصوصی تھے۔ محمد عمران ثمر اور فقیر حسین چشتی نے مہمانانِ اعزاز کی حیثیت سے شرکت کی۔ نظامت کے فرائض پروفیسر ریاض احمد قادری نے انجام دیے، جنہوں نے اپنی شگفتہ گفتگو، علمی انداز اور نعتیہ ذوق کے باعث محفل کو ایک خوبصورت ادبی ترتیب عطا کی۔ ان کی جانب سے سات نعتیہ کلام پیش کرنا بھی اس نشست کا ایک قابلِ ذکر پہلو رہا۔صاحبِ صدر محمد جمیل چشتی نے اپنے صدارتی خطاب میں نعت گوئی کی اہمیت اور اس کے تقدس پر اظہارِ خیال کرتے ہوئے کہا کہ نعت گوئی ایک ایسی مبارک صنفِ سخن ہے جس میں شاعر کو ملائکہ کی تائید حاصل ہوتی ہے۔ حضور اکرم ﷺ کی مدح و ثنا محض ادبی مشق نہیں بلکہ محبت اور عقیدت کا اظہار ہے۔ انہوں نے پروفیسر ریاض احمد قادری اور میزبانِ محفل اللہ نواز منصور اعوان کا شکریہ ادا کیا کہ انہوں نے ان کے کلام سے مصرعِ طرح منتخب کرکے انہیں اس باوقار نشست کی صدارت کا موقع فراہم کیا۔اس موقع پر محمد جمیل چشتی نے اپنا مکمل نعتیہ کلام بھی پیش کیا، جس میں سے طرحی مصرع منتخب کیا گیا تھا۔ معروف ثنا خواں محمد شفیق مرزا نے اسی کلام کو اپنی خوبصورت آواز اور عقیدت بھرے انداز میں پیش کرکے محفل کے روحانی ماحول کو مزید دلنشیں بنا دیا۔ نعت جب خوش الحانی کے ساتھ پیش کی جاتی ہے تو سامعین کے احساسات میں ایک خاص کیفیت پیدا ہوتی ہے، اور اس محفل میں بھی یہی کیفیت محسوس کی گئی۔اس بابرکت تقریب کا ایک اہم اور یادگار لمحہ وہ تھا جب محمد جمیل چشتی کی تاحیات نعتیہ اور ادبی خدمات کے اعتراف میں انہیں فیصل آباد شہرِ نعت کا ممتاز نعتیہ اعزاز ”فقیر مصطفیٰ نعت ایوارڈ 2026ء‘ پیش کیا گیا۔ کسی صاحبِ فن کی طویل ادبی جدوجہد کو تسلیم کرنا دراصل اس فن اور روایت کی قدر افزائی ہے جس کے لیے وہ اپنی زندگی وقف کرتا ہے۔ محمد جمیل چشتی کی خدمات کا اعتراف یقیناً نعتیہ ادب سے وابستہ حلقوں کے لیے خوش آئند ہے۔مشاعرے میں 32 شعراءکرام نے براہِ راست اپنے کلام کے ذریعے شرکت کی، جب کہ متعدد اہلِ قلم نے آن لائن بھی اپنی نعتیہ تخلیقات پیش کیں۔ شرکائے مشاعرہ میں زاہد سرفراز زاہد ، ڈاکٹر اظہار احمد گلزار، منیر احمد خاور، میاں منیر احمد منیر، ذیشان حسینی، ریاض احمد قادری، سرور قمر قادری، منصور نواز اعوان، سلیم شاہد، اشفاق ہمزالی، پروفیسر محمد امین عزمی، محمد جاوید اطہر، سید شاہد حسین شاہد، ندیم چشتی، فقیر حسین چشتی، اللہ رکھا عاجز سیالوی، نعیم صدیقی، حافظ ضمیر حسین اطہر قادری، حافظ علی عارف، حافظ محمد ضمیر اطہر قادری، محمد ریاض حسین فاروقی، ڈاکٹر پرویز اختر نوشاہی، محمد ریاض عمران ثمر اور صاحبزادہ توصیف حیدر چشتی سمیت دیگر اہلِ سخن شامل تھے۔آن لائن کلام پیش کرنے والوں میں راقم الحروف شاہد نسیم چوہدری کے علاوہ مبشر حسین فیضی، حافظ حمید اللہ صوفی، ڈاکٹر مقصود احمد عاجز، مبشر کامل، سید شاہد حسین شاہد، ریاض احمد خلجی، اشفاق حیدری، ارشد محمود ارشد اور وارث علی وارث کے نام بھی شامل تھے۔ دورِ جدید میں آن لائن شرکت نے ادبی سرگرمیوں کو جغرافیائی حدود سے آزاد کرکے ایک دوسرے سے دور بیٹھے شعرائ کو بھی مشترکہ ادبی محفل کا حصہ بننے کا موقع فراہم کیا ہے۔ میرے لیے بھی اس نعتیہ مشاعرے میں آن لائن کلام پیش کرنا باعثِ سعادت اور قلبی مسرت کا اظہار تھا
نعتِ رسولِ مقبول ﷺ
پنجابی نعت شریف (محمد شاہد نسیم)
آدل دا وضو کرکے، سرکار دی گل کریئے
دل عشق دے نل بھر کے، سرکار دی گل کریئے
لب اتے درود ہووے، دل وچ حضور? ہوون
دل روح وفا کرکے، سرکار دی گل کریئے
دنیا دے بھلا کے غم ، اکھیاں نوں کرکے نم
دل صاف صفا کرکے، سرکار دی گل کریئے
طیبہ دی ہوا آوے، دل جھوم جھما جاوے
منہ طیبہ دے ول کرکے، سرکار دی گل کریئے
قرآن دی روشنی وچ، سنت دے رستے وچ
اس راہ تے قدم دھر کے، سرکار دی گل کریئے
مکے دی اے شاں وکھری، طیبہ دااے رنگ سوہنا
دل طیبہ دے ول کر کے، سرکار دی گل کریئے
آقا دی محبت دی، سینے چ ضیاء ہووے
ایمان جواں کرکے، سرکار دی گل کریئے
آس حشر والے دن دی، اس دل دے وچ رکھ کے
رب اگے دعا کرکے، سرکار دی گل کریئے
شاہد دی خواہش اے ، طیبہ دی حضوری دی
اللہ دی گل کے، سرکار دی گل کریئے
یہاں ایک بات قابلِ توجہ ہے کہ نعتیہ مشاعروں کی اہمیت صرف اس امر میں نہیں کہ کتنے شعرائ نے کلام پیش کیا یا کتنے سامعین نے داد دی، بلکہ اصل اہمیت اس ادبی و روحانی تسلسل کی ہے جو نسل در نسل محبتِ رسول ﷺ کے جذبات کو منتقل کرتا ہے۔ نعت گوئی میں لفظوں کی خوبصورتی کے ساتھ عقیدے کی پاکیزگی، احترامِ مصطفیٰ ﷺ اور فنی ذمہ داری بھی بنیادی اہمیت رکھتے ہیں۔ ایک اچھا نعت گو شاعر صرف اپنے جذبات کا اظہار نہیں کرتا بلکہ اپنے الفاظ کے ذریعے سامعین کے دلوں میں ادب و محبت کی شمع بھی روشن کرتا ہے۔انجمنِ فقیرانِ مصطفیٰ کی 281 ماہانہ نشستوں کا سفر اس حقیقت کا گواہ ہے کہ مستقل مزاجی اور اخلاص کے ساتھ ادبی روایت کو زندہ رکھا جا سکتا ہے۔ یہ محض ایک عدد یا تقریبات کی گنتی نہیں بلکہ ایک طویل عزم، مسلسل محنت اور محبتِ رسول ﷺ سے وابستگی کی داستان ہے۔ ایسے ادارے معاشرے میں روحانی اقدار کے تحفظ کے ساتھ ساتھ مقامی زبانوں، بالخصوص پنجابی نعتیہ ادب کی ترویج میں بھی اہم کردار ادا کرتے ہیں۔محفل کے اختتام پر صاحبزادہ لطیف ساجد چشتی اور نعیم صدیقی کی صحت و عافیت کے لیے خصوصی دعا کی گئی۔ فقیر حسین چشتی نے دعائے خیر کروائی، جب کہ انجمن کے بانی فقیر مصطفیٰ امیر اور ان کے مرحوم صاحبزادے ملک بابر نواز اعوان کے لیے فاتحہ خوانی بھی کی گئی۔ بارگاہِ رسالت مآب ? میں درود و سلام کے نذرانے پیش کرنے کے بعد یہ روح پرور نشست اختتام پذیر ہوئی۔بلاشبہ انجمنِ فقیرانِ مصطفیٰ کا یہ سلسلہ قابلِ تحسین ہے۔ اللہ نواز منصور اعوان، پروفیسر ریاض احمد قادری اور انجمن سے وابستہ تمام احباب مبارک باد کے مستحق ہیں جو مسلسل اس چراغ کو روشن رکھے ہوئے ہیں۔ ضرورت اس امر کی ہے کہ ایسی ادبی محافل کو محض روایتی تقریبات تک محدود نہ رکھا جائے بلکہ نوجوان نسل کو بھی ان سے جوڑا جائے، نعتیہ ادب کی فنی و فکری تربیت کا اہتمام کیا جائے اور اہلِ قلم کی حوصلہ افزائی کو مستقل روایت بنایا جائے۔میری نظر میں نعت کا اصل حاصل شہرت، پذیرائی یا ایوارڈ نہیں بلکہ وہ قلبی نسبت ہے جو ایک امتی کو اپنے آقا و مولا حضرت محمد مصطفیٰ ﷺ سے وابستہ رکھتی ہے۔ یہی نسبت جب قلم کے ذریعے اظہار پاتی ہے تو لفظ عبادتِ محبت کا استعارہ بن جاتے ہیں۔*اللہ تعالیٰ انجمنِ فقیرانِ مصطفیٰ کی اس نعتیہ و ادبی جدوجہد کو قبول فرمائے، اس کے منتظمین کو مزید توفیق عطا کرے اور ہمیں سیرتِ طیبہ ﷺ کی روشنی میں اپنی زندگیوں کو سنوارنے کی سعادت نصیب فرمائے۔ آمین۔