مسلم آئیڈیل ہائی اسکول شاہدرہ، علم کی شمع سے مصنوعی ذہانت کے عہد تک
نصف صدی کے قریب تعلیمی سفر، نسلِ نو کی آبیاری اور مستقبل کے تقاضوں سے ہم آہنگ ایک روشن داستان۔مسعود علی خان کا کلیدی خطاب خاصے کی چیز
منشا قاضی
تعلیم محض کتابوں کے اوراق یا اساتذہ کے صفحہ ئ ادراک پر درج الفاظ کا مجموعہ نہیں، بلکہ یہ وہ چراغ ہے جو نسلوں کے ذہنوں میں روشنی، کردار میں پختگی اور زندگی کے آسمان کے افق پر امید کے نئے سورج طلوع کرتا ہے۔ کسی تعلیمی ادارے کی اصل عظمت اس کی عمارتوں کی بلندی، کلاس رومز کی وسعت یا طلبہ کی تعداد سے نہیں، بلکہ ان خوابوں کی تعبیر سے متعین ہوتی ہے جو اس کی آغوش میں پروان چڑھتے ہیں۔ لاہور کے تاریخی علاقے شاہدرہ ٹاو¿ن میں قائم مسلم آئیڈیل ہائی اسکول بھی ایک ایسی ہی روشن روایت کا امین ہے، جس نے 1979ئ میں محدود وسائل کے باوجود علم و آگہی کا جو سفر شروع کیا، آج وہ ایک تناور شجر کی صورت اختیار کر چکا ہے۔ یہ شجر ، سایہ دار بھی ہے اور ثمر بار بھی ہے۔ خود غرضی کے تپتے ہوئے صحرا میں اس سکول کا وجود بادِ صبح گاہی کا خوشگوار جھونکا ہے۔ سی ٹی این فورم کے سربراہ مسعود علی خان کی دورس نگاہ کا یہ اعجاز ہے کہ انہوں نے تصور کی روشنی میں پورے سکول کا معائنہ فرما لیا تھا اور آج وہ بچوں کے درمیان موجود تھے۔ اقبال کے شاہین فہیم نقوی جنہوں نے دیار عشق میں اپنا ایک مقام بنا لیا ہے اور نئے زمانوں اور نئے صبح شام پیدا کر رہے ہیں ، آپ کی ایک طویل عرصے سے یہ خواہش تھی کہ مسعود علی خان سکول کے بچوں اور ان کی ماو¿ں سے خطاب فرمائیں بقول شاعرِ مشرق ماو¿ں کی پیشانیوں پر جو تحریر ہوتا ہے وہ قوم کی تقدیر ہوتی ہے۔ مسعود علی خان کی تقریر خاصے کی چیز ثابت ہوئی اور طلبا اور ان کی مائیں مہمان مقرر کی دلچسپ تقریر کی تاثیر میں ڈوب گئیں اور فہیم نقوی ایک طویل عرصے سے خان معظم کی گفتگو کی جستجو میں لگے رہتے ہیں اور وہ اسی لیئے کامیاب ہیں۔ آپ دیکھیں ۔راوی پار، شاہدرہ کی سرزمین پر قائم یہ ادارہ اس حقیقت کی زندہ مثال ہے کہ اگر ارادے مضبوط، مقصد بلند اور خدمت کا جذبہ خالص ہو تو وسائل کی کمی منزل کی راہ میں رکاوٹ نہیں بن سکتی۔ تین مخلص اساتذہ، محمد صدیق، محمد رمضان فخر اور عبد الحمید شاہین نے شراکت داری کی بنیاد پر اس ادارے کی داغ بیل ڈالی۔ ان کے پاس شاید بڑے بڑے تعلیمی منصوبوں کے لیئے بے شمار مالی وسائل موجود نہ تھے، مگر ان کے دلوں میں علم کی شمع روشن کرنے کا عزم اور نئی نسل کے مستقبل کو سنوارنے کی لگن ضرور موجود تھی۔ یہی جذبہ ان کی سب سے بڑی قوت بنا۔وقت کے ساتھ ساتھ مسلم آئیڈیل ہائی اسکول نے اپنی علمی، تربیتی اور تعلیمی خدمات کے ذریعے شاہدرہ ٹاو¿ن میں ایک نمایاں مقام حاصل کیا۔ آج یہ ادارہ علاقے کے بڑے اور معتبر تعلیمی مراکز میں شمار ہوتا ہے، جہاں 1300 سے زائد طلبہ و طالبات زیورِ تعلیم سے آراستہ ہو رہے ہیں۔ اس ادارے کے فارغ التحصیل طلبہ نے عدلیہ، طب، انجینئرنگ، ہوا بازی اور دیگر اہم شعبہ ہائے زندگی میں اپنی صلاحیتوں کا لوہا منوایا ہے۔ یہ کامیابیاں محض انفرادی افراد کی داستانیں نہیں، بلکہ اس ادارے کی تعلیمی بصیرت، اساتذہ کی محنت اور والدین کے اعتماد کا اجتماعی ثمر ہیں۔ مسعود علی خان نے کہا کہ عصرِ حاضر میں دنیا ایک غیر معمولی علمی و سائنسی انقلاب سے گزر رہی ہے۔ مصنوعی ذہانت (Artificial Intelligence) نے انسانی زندگی کے تقریباً ہر شعبے میں اپنی موجودگی کا احساس دلانا شروع کر دیا ہے۔ تعلیم، تحقیق، طب، صنعت، ابلاغ اور کاروبار سمیت متعدد میدانوں میں AI نئی جہتیں متعارف کرا رہی ہے۔ ایسے میں یہ سوال انتہائی اہمیت اختیار کر جاتا ہے کہ ہم اپنے بچوں کو مستقبل کی اس بدلتی ہوئی دنیا کے لیئے کس طرح تیار کریں؟ انہوں نے کہا کہ کیا محض روایتی نصابی تعلیم آنے والے زمانے کے تقاضوں کو پورا کر سکے گی؟ اور کیا والدین و اساتذہ اپنی ذمہ داریوں کو نئے تناظر میں سمجھنے کے لیئے تیار ہیں؟ مسعود علی خان نے کہا کہ انہی اہم سوالات کے جواب تلاش کرنے اور تعلیم کے مستقبل پر بامقصد مکالمے کی بنیاد رکھنے کے لیئے مسلم آئیڈیل ہائی اسکول شاہدرہ نے والدین کی پہلی خصوصی کانفرنس کا انعقاد کیا، جس کا موضوع ہےیعنی مصنوعی ذہانت کے دور میں تعلیمی اداروں کی ازسرِنو تشکیل اور مستقبل کے تعلیمی تصورات۔شاہدرہ ٹاو¿ن میں منعقد ہونے والی یہ کانفرنس اپنی نوعیت کی ایک قابلِ ذکر علمی و فکری نشست تھی، جس میں تقریباً 700 والدین نے شرکت کی۔ والدین کی اس غیر معمولی تعداد نے اس امر کو واضح کیا کہ اب تعلیم کا تصور صرف اسکول کی چار دیواری تک محدود نہیں رہا، بلکہ خاندان بھی بچوں کی علمی، ذہنی اور اخلاقی تربیت میں اپنا فعال کردار ادا کرنے کیلئے سنجیدہ ہے۔ کانفرنس کی نظامت مسلم آئیڈیل ہائی اسکول کے ڈائریکٹر آف اکیڈمکس ڈاکٹر حسن صدیقی نے انجام دی۔ وہ اپنی گفتگو، نقابت، خطابت اور انتظامی امور کے شعور کے باعث نشست کو ایک مربوط، بامقصد اور فکری انداز میں آگے بڑھاتے رہے۔ آپ کی نقابت میں خطابت کبھی غالب آ جاتی اور کبھی وہ دلائل کی قوت سے فصاحت و بلاغت کو نذرِ آتش کر دیتے تھے ، آپ کی زیرِ نگرانی منعقد ہونے والا یہ مکالمہ محض ایک رسمی تقریب نہیں، بلکہ تعلیم کے بدلتے ہوئے منظرنامے کو سمجھنے کی ایک سنجیدہ کاوش تھا۔پینل میں ممتاز شخصیات نے شرکت کی، جن میں سی ٹی این فورم کے بانی چیئرمین، معروف ہاسپیٹیلٹی و مینجمنٹ ایکسپرٹ اور پاکستان کے نوجوانوں کے محسن مسعود علی خان، EAST Publications سے وابستہ فہیم نقوی اور ممتاز ماہرِ نفسیات ڈاکٹر شمیلہ ارم شامل تھے۔مسعود علی خان کی شخصیت خدمت، تجربے، فکری وسعت اور نوجوان نسل کی رہنمائی کے جذبے سے عبارت ہے۔ وہ ذاتی تشہیر سے بے نیاز ہو کر نوجوانوں کی صلاحیتوں کو اجاگر کرنے اور انہیں زندگی کے عملی میدان میں کامیابی کے راستے دکھانے کے داعی ہیں۔ ان کی شرکت نے کانفرنس میں ایک ایسے تجربہ کار رہنما کی موجودگی کا احساس پیدا کیا، جو تعلیم کو محض حصولِ ڈگری نہیں بلکہ شخصیت سازی اور زندگی کی تیاری کا وسیلہ سمجھتے ہیں۔فہیم نقوی ایک جواں فکر، متحرک اور تربیت و تعلیم کے جدید تصورات سے وابستہ شخصیت ہیں۔ ان کی علمی و فکری جہت نوجوانوں میں سائنسی شعور، تخلیقی صلاحیتوں اور عملی مہارتوں کے فروغ سے تعلق رکھتی ہے۔ ان کی گفتگو نے تعلیم کو روایتی حدود سے نکال کر جدید علوم، تحقیق، تخلیق اور مستقبل کی ضروریات سے مربوط کرنے کے تصور کو تقویت بخشی۔ ڈاکٹر شمیلہ ارم، ممتاز کلینیکل سائیکالوجسٹ، نے بچوں کی ذہنی و نفسیاتی نشوونما، جذباتی صحت اور والدین کے تربیتی کردار کے حوالے سے اپنی ماہرانہ بصیرت پیش کی۔ ان کی موجودگی نے اس حقیقت کو اجاگر کیا کہ ایک کامیاب طالب علم صرف ذہین ہی نہیں ہوتا، بلکہ اس کی جذباتی کیفیت، خود اعتمادی، ذہنی سکون اور ماحول سے ہم آہنگی بھی اس کی کامیابی میں بنیادی کردار ادا کرتی ہے۔ شمیلہ ارم کی نرم و نازک خیال مگر عزم چٹان کی مانند ہے۔
عزم اپنا چٹان کی مانند
اور نازک خیال ہیں ہم لوگ
کانفرنس کے دوران اس امر پر خصوصی توجہ دی گئی کہ مصنوعی ذہانت کے دور میں بچوں کی تربیت و تعلیم کے لیئے اسکول اور گھر کے درمیان مضبوط اشتراک ناگزیر ہے۔ والدین اسکول سے کیا توقعات وابستہ کریں؟ اسکول والدین سے کس نوعیت کے تعاون کا خواہاں ہو؟ اور بچوں کے مستقبل کو محفوظ، روشن اور بامعنی بنانے کے لیئے دونوں فریق اپنی مشترکہ ذمہ داریوں کو کس طرح ادا کر سکتے ہیں؟یہ سوالات محض تعلیمی انتظام کے معاملات نہیں، بلکہ ایک ایسی نسل کی تشکیل سے تعلق رکھتے ہیں جو آنے والے وقت میں معاشرے کی قیادت کرے گی۔مصنوعی ذہانت معلومات کے حصول کو آسان بنا سکتی ہے، لیکن اخلاقی شعور، انسانی ہمدردی، ذمہ داری، برداشت، تخلیقی سوچ اور درست فیصلے کرنے کی صلاحیت اب بھی انسانی تربیت کے بنیادی عناصر ہیں۔ بچے کو ٹیکنالوجی کا استعمال سکھانا ضروری ہے، مگر اس سے بھی زیادہ ضروری یہ ہے کہ اسے ٹیکنالوجی کے ذمہ دارانہ استعمال کا شعور دیا جائے۔ اسے یہ سمجھایا جائے کہ علم کا مقصد صرف مقابلے میں آگے نکلنا نہیں، بلکہ انسانیت کی خدمت اور معاشرے کی بہتری بھی ہے۔اس نشست میں والدین کو بچوں کے تعلیمی سفر میں معاونت، ان کی ذہنی نشوونما، سیکھنے کے عمل کو بہتر بنانے اور مستقبل کے چیلنجز سے ہم آہنگ ہونے کے لیئے عملی رہنمائی فراہم کی گئی۔ شرکائے کانفرنس نے اسکول انتظامیہ اور پینل کے ارکان کی کاوشوں کو سراہتے ہوئے ان کا شکریہ ادا کیا۔مسلم آئیڈیل ہائی اسکول کی اس تقریب کا ایک نہایت دلکش اور قابلِ تحسین پہلو طلبہ و طالبات کے تیار کردہ سائنسی و تخلیقی منصوبوں کی نمائش بھی تھا۔ ننھے سائنسدانوں کے ہاتھوں سے تخلیق پانے والے شاہکاروں کے اسٹالز نے اس بات کا ثبوت فراہم کیا کہ بچوں کے ذہنوں میں صرف نصابی معلومات ہی نہیں، بلکہ تحقیق، تجربے اور تخلیق کے بے شمار امکانات بھی جنم لے رہے ہیں۔مہمانِ خصوصی مسعود علی خان اور ڈاکٹر شمیلہ ارم نے طلبہ کے تیار کردہ سائنسی ماڈلز اور عملی منصوبوں کا مشاہدہ کیا۔ انہوں نے بچوں کی تخلیقی صلاحیتوں، محنت اور سائنسی ذوق کو دل کھول کر داد دی اور ان کی حوصلہ افزائی کی اور یہ حوصلہ افزائی مسیحائی سے کم نہ تھی اور یہ لمحے یقیناً ان بچوں کے لیئے ایک قیمتی سرمایہ تھے، کیونکہ جب کسی طالب علم کی محنت کو معتبر شخصیات کی جانب سے سراہا جاتا ہے تو اس کے اندر خود اعتمادی کا چراغ مزید روشن ہوتا ہے۔ اس کی تخلیقی سوچ کو تقویت ملتی ہے اور وہ اپنے خوابوں کو حقیقت میں بدلنے کے لیئے نئے عزم کے ساتھ آگے بڑھتا ہے۔یہ سائنسی نمائش اس تصور کی عملی ترجمان تھی کہ تعلیم صرف کتاب پڑھنے، سوالات یاد کرنے اور امتحانات میں نمبر حاصل کرنے کا نام نہیں، بلکہ علم کو زندگی میں برتنے، مسائل کا حل تلاش کرنے اور نئے امکانات دریافت کرنے کا عمل بھی ہے مسلم آئیڈیل ہائی اسکول کی تقریب نے یہ پیغام دیا کہ ایک کامیاب تعلیمی ادارہ وہی ہے جو ماضی کی روایات کا احترام کرتے ہوئے مستقبل کے تقاضوں کو بھی سمجھتا ہو۔ 1979ئ میں تین اساتذہ کے محدود وسائل سے شروع ہونے والا یہ سفر آج 1300 سے زائد طلبہ کی علمی و تربیتی ذمہ داریوں تک پہنچ چکا ہے۔ یہ ترقی محض اعداد و شمار کی کہانی نہیں، بلکہ عزم، استقامت، محنت اور اعتماد کی ایک طویل داستان ہے۔اس ادارے نے شاہدرہ ٹاو¿ن میں تعلیم کے فروغ کے ساتھ ساتھ والدین، اساتذہ اور طلبہ کے درمیان ایک ایسا رشتہ استوار کرنے کی کوشش کی ہے جو نسلِ نو کی کامیابی کے لیئے بنیادی اہمیت رکھتا ہے۔ ایسی پرشکوہ کانفرنس اس بات کا اعلان بھی تھی کہ اسکول اب مستقبل کے تعلیمی چیلنجز کو محض دیکھ نہیں رہا، بلکہ ان کے لیئے فکری اور عملی تیاری کا آغاز کر چکا ہے۔ تعلیم کا اصل حسن اس وقت نمایاں ہوتا ہے جب اس کے اثرات کلاس روم سے نکل کر معاشرے کی زندگی میں محسوس ہونے لگتے ہیں۔ مسلم آئیڈیل ہائی اسکول شاہدرہ کی داستان بھی اسی حقیقت کی عکاس ہے۔ یہ ادارہ نسلِ نو کی فصل کو شاداب کرنے، ذہنوں میں علم کے بیج بونے اور کردار کی زمین کو زرخیز بنانے میں مصروف ہے۔مصنوعی ذہانت کے اس نئے عہد میں ضرورت اس امر کی ہے کہ ہمارے تعلیمی ادارے بچوں کو صرف جدید ٹیکنالوجی سے آشنا نہ کریں، بلکہ انہیں انسانیت، اخلاقیات، تحقیق، تخلیق اور ذمہ داری کے اصولوں سے بھی روشناس کرائیں۔ کیونکہ مستقبل کی دنیا میں کامیاب وہی نسل ہوگی جو مشینوں کی رفتار سے واقف ہونے کے ساتھ انسانی دل کی دھڑکن کو بھی سمجھتی ہو۔مسلم آئیڈیل ہائی اسکول کی یہ کانفرنس ایک روشن تعلیمی روایت کا نیا باب ہے۔ یہ اس یقین کی تجدید ہے کہ اگر اسکول، والدین، اساتذہ اور معاشرہ ایک مشترکہ مقصد کے تحت متحد ہو جائیں تو آنے والی نسلوں کے لیئے ترقی، کامیابی اور خوشحالی کے دروازے کھولے جا سکتے ہیں۔شاہدرہ کی اس علمی بستی میں روشن ہونے والی یہ شمع یقیناً مستقبل کے کئی چراغوں کو روشنی عطا کرے گی۔ اور یہی کسی تعلیمی ادارے کی سب سے بڑی کامیابی ہے کہ اس کی روشنی اس کی اپنی عمارت سے نکل کر پورے معاشرے کے افق کو منور کر دے۔مسلم آئیڈیل ہائی اسکول — جہاں علم روایت بنتا ہے، تربیت کردار سنوارتی ہے اور مستقبل نئے امکانات کے ساتھ جنم لیتا ہے۔ سکول کے اساتذہ علامہ اقبال کی فکر کی روشنی میں نورِ بصیرت کی قندیلیں فروزاں کر رہے ہیں۔ جواں سال ماہر تعلیم فہد عباس کی کمی محسوس کی گئی وہ ملک سے باہر نہ ہوتے تو راوی پار ہوتے اور راوی ہوتے۔ فہد عباس میرے استاد ہیں اور میں نے آپ سے بہت کچھ سیکھا ہے۔ اور وہ اقبال کے اس شعر کی عملی تفسیر ہیں۔
دیارِ عشق میں اپنا مقام پیدا کر
نیا زمانہ نئے صبح و شام پیدا کر






